رب عذرٍ أقبح من ذنب

بان إليوم بالواضح أن شرطتنا التونسية قمة فالبهامة .

أول مرة نسمع بشرطة متلقى حتى حل بش تفرق 2000 متظاهر إلى بستعمال الكرتوش بش تزيد فطين بلة وتزيد تعقد لومور.

يا بو قلب جيش إسرائيل ومندراك، كيف اهيجو عليه الفلسطينيين في القدس يخسر عليهم شوية مطراك وشوية قنابل مسيلة لدوموع ويا ناس ما كان باس وكان طارة يستعمل كرطوش بلاستيك جست باش يفجعوهم وبرا .

تي فرنسا قد ماكلت بعضها فالبنليو وتحرقو كراهب ومحلات مسمعنش بشرطة تقتل في أولاد شعبها في عز شباب رغم إلي نعرفو لاي درجة سي سركوزي يكره متسكني المناطق هذي.

وبما انو تونس ولات حافلة هل مدة بالاحتجاجات(بعد بن قردان ورديف وسيدي بوزيد حالياً) وتحسباً لأحداث أخرى مش مستبعدة، مافيها باس كان نعطيو بعض النصائح لشرطتنا باش ما تتحطش في موقف مماثل فالمناسبات القادمة .

وفي مايلي بعض اصور لوسائل تستعملها شرطة البلدان المتقدمة بش تحل مشاكلها.

هذا باش منحكيوش على وسائل أخرى غالية شوية على شرطتنا.

كما ننصح المسؤولين في وزارة إداخلية بش يطلع ع ربط هذا في الويكيبيديا.

ونقدم فلخر تعازية لعائلة الشاب لتوفى ليوم و عائلتي الشابين إلي قتلهم لقهر فالأيام الماضية ولي ماتوا بش أولاد بلادهم إعيشوا بكرامة .

ومننساش بش انحيي أهالي ولاية سيدي بوزيد على شجاعتهم و جرأتهم.